كلمات: مهدي سيما
هي كلمة و لا سؤال؟
كتحير لذهان و كاتجي على كل لسان..
سولت راسي علاش انا هنا و ماشي لهيه،
علاش انا بنو آدم و علاش ما تخلاقيتش مع الملايكة و لا الجان؟؟
و علاش زهري ما فرح يفوح فوحان
و انا نظل نقلب على سعدي
و ماله ما بغا يبان؟
علاش انا ما نكونش انت، و انت تكون انا و الأخر يكون هي و هي تكون هو،
و نبغي انا نختار: آش بغيت انا نكون ..
شتي الدنيا فايتة
كون غير انت هو انت
و غادي تعرف علاش خلاقيتي فهاد الكون.
Arabic